خمسة شهور ناقصين شوية

قداش عندك ما كتبتش ؟

4 شهور و نص ، 135 يوم ، 3240 ساعة ، 194000 دقيقة ، 11664000 ثانية

في 4 شهور و نص ، نطفة توللي عندها ايدين و رجلين ، بلا صوابع .

تنجم تسمع قلبها يدق و تنجم زادة تعرفها طفلة ولا طفل ،

وقتها عاد انجموا نعرفوا زادة نشروا الحرج متاع الملحفة و زينة البيت في الوردي ولا في الأزرق ، 

و نبدوا نخيروا في الأسامي ..

في 4 شهور و نص ، تنجم تخلق فيلم ، سيناريو و كاستينغ

و تنفخ روح في أوراق و تصاور و توللي دنيتك كاميرا و جنتك تورناج .

ووقتها عاد تخمم في الجينيريك و الموسيقى التصويرية و النقاد و أرتيكل في مجلة "فن و حرية" ..

في 4 شهور و نص تنجم تخلق فيلم و مبعد تقتلو 

في 4 شهور و نص ، تنبت وردة . 

زريعة طيشتها في عشوية خريف بحذا شجرة الرمان و نسيتها . ت

عمل عروق و توطن في أرضك ..

شفت كي نقلك راهو عمرك ما نهار تنجم تعرف أرضك شبر شبر ؟  و

مبعد ما تعمل عود و أوراق ، تبدا تخمم في لون الوردة و تقول يا ليتها تجي حمرة ،

عالأقل في عيد الحب مانشدش الصف .

شفت ماهو كي تحب تلونها قبل ما تتولد ؟

هذاكا علاش جاتك وردة حمرة ، آما بالشوك .

في 4 شهور و نص ، شعب فقير يولي أفقر.

هاج ، ماج ، صاح ، شاح ، غرق ، شرق ، بكى ، على شوارعو سها ،

قام لقى  السماء بلا لون و غرام الذهب بايطرة حليب .

وقتها عاد رجع بكى و كي قام  في الصباح دموعو نسى.

موش قلتلكم فقير ؟ آما مالحب .. موش من حاجة أخرى .

في 4 شهور و نص ، تنجم تعشق .

تبدا متكي على كرسي في قهوة مقابلة سينما ،

و الشارع ضيق و الفريكاساي ديما أرخص من تيكاي الفيلم ،

هذاكا علاش ديما حانوت الفريكاساي معبي  و حانوت الأفلام فارغ ،

خاطرو شعب فقير مالفلوس ، موش من حاجة أخرى .

وقتها عاد تبدا انت متكي ، وهي تتعدى

و تسمعها تحكي على آخر فيلم يحكي عالفسفاط ولا حاجة هكة 

تهز راسك تلقاها سمرة ، غنجة ، زعمة قفصية ؟

في 4 شهور و نص ، تتبنى دار جديدة في حومتك ،

وانت عندك خمسة شهور ما روحتش ،

الدار لونها أحمر . و تسمع جارك الشيوعي ينبر :

شفت ماهو كيفاش الرأسماليين المتعفنين يدهنوا في حيوطهم بلون الثورة ؟

ملا سكيزوفرينية .

و تبدا انت شايخ و موش مقلقتك الحكاية  خاطر الأحمر متاعك اسمو ماجنتا .

في 4 شهور و نص ،  سمعت اننو صارت تحسينات تشويهية للبار الثوري بالعاصمة ،

و كل يوم يجيك واحد يقلك ، شفت ماهو كيفاه ولى ؟ ملا ذائقة متردية .

و تبدا انت تتخيل فيه كيفاش ولا آما ديما متأكد اننو عمرو ما يوللي أفظع من روادو .

ووقتها عاد ، تحب تتلفتلهم و تقلهم ،

صحوة الخدامة و الخماسة ستسكركم دون خمرة و دون رجعة

في 4 شهور و نص ، شعرك يطوال . يوللي يتشد ،

و توللي تلوج في شكال ولا بانس فماش ما يتلم .

و يتكسر الشكال و تخزر لروحك في المراية :  هكة خير .

ووقتها عاد تتأكد اننو عمرك ما تنجم تصبغ شعرك ،

خاطرو لونو ليلي و انت عينيك ليلي .

في 4 شهور و نص ، تحفظ شوارع جدد و زناقي كل وحدة تهز لأختها .

و بعد 4 شهور و نص مازلت مانجمتش تفهم ، كيفاش القشابية تتباع بتيكاي

و كيفاش البرنوس مكتوب عليه تونس بالرومي و كيفاش الكسرة نوع واحد يابس

و كيفاش الحمام بخمسة دينارات و من غير سواك .

في 4 شهور و نص ، تتفرج في ياسر أفلام ، ت

ونسي على مغربي و دزيري (مانفرقهمش مليح اللهجات) و

توللي المونديال أقربلك من بيتك (4 ميترو على 5)

و المرا اللي تبيع في التيكيات تقللك : ياخي ما عندك تعمل ديما تتفرج في التصاور ؟

و بعد برشة أفلام ، تبدا تفهم اننو البره فيلم بلاش جينيريك .

في 4 شهور و نص ، 99 بيان و ما يقل عنهما بقليل مسيرات

و أكثر منهم بشوية اضرابات جوع ،

من غير ما نحكي عالاضرابات الملغية و المعلقة و المنفذة و الناجحة و

الفاشلة و البين بين ،

و شوية مؤتمرات و اجتماعات شعبية و أخرى نخبوية (؟

) و الحصيلة : الشعب يصاب بالعمى ،

عمى الألوان موش حاجة أخرى .

في 4 شهور و نص ،   كتبت على اربعة شهور و نص

 و طيشت الاوراق في المحطة

                          

    مريم  الرّابحي