جيفارا النّبي المسلّح

نتفكّر كِـ بدات الثورة التونسية، خرجوا الناس، هازّين تصاور ڤيفارا، الـ تشي، بِـ جنب علامات تونس و حشّاد، مراول و سيكان و شاپووات و أعلام و پينسوات. ڤيفارا، الثائر و الإنسان، شعار لِـ الثورة. راجل شجاع خذى من قضيّة تحرير الشعوب، مِـ الاستبداد، مِـ الظلم، مِـ القهر، أساس لِـ حياتو اللّي عدّاها مناضل ڤدع، ما رماش سلاحو حتّى استشهد.

الـ تشي، شبوبيّه و لعب، ها الصخط، لحيه و شعر طويل، فيريل، رجولي، كاريزماتيك، عينين كحله واسعه و حزينه، زي عسكري بالح، صدر محلول، برودكان مغبّر. خرّج موس بوسعديّه من جيبو، نحّى الطرف اللّي يشعل من سيڤار الهافانا، جيّف تلقى ما تتكيّف. حطّ النُصّ اللّي ما تكيفوش في جيبو، خبّى الموس. دخل لِـ الأمم المتحدة، شعّلها الدنيا، ضدّ الإستعمار و الإمبرياليه.

يعجبك ڤيفارا؟ معلّق پوستار في خزانتك؟ تلبس بيريّة كيفو؟ في بالك بيه مريض بِـ رواريه، عندو الربو؟ في مرضتو، الكتاب جليسو. حتّى كِـ مات، لقاو في ساكو كتاب "الثورة الدائمة" متاع عمّك تروتسكي. الـ تشي قرى نيرودا و حفظ شعر لوركا و أنطونيو ماتشادا في عمر لثناش عام. شاخ عَ الأدب الروسي، كيما الناس اللّي يفهموا الكل، تولستوي و جوركي و ديستويفسكي و بيترو كروبوتكين. كلى كتب أوراسيو كيروڤا و أناطول فرانس و خوزي مارتي و غاندي و ماركس و إنجلز و جون شتاينبك و سارتر. تسمع باهم؟

ڤيفارا كان طبيب، خساره استشهد قبل ما يكمل كتابو "وظيفة الطبيب"، يمكن كان كمّلو راو لقينا حلول نهائيه لِـ مشاكل الرعايه الصحيه و الصبيطارات و الدواء. "مات الڤدع فوق مدفعه جوّه الغابات". ترزينا فيه. قاري على روحو، حافظ دروسو، بِـ ڤلبو، كرتوشو في جيبو، قلمو في جيبو، ملّخر بِـ كرارزو. عندك كرارز؟

حكى عَ الفقر، حارب الفقر، خاطر شاف الفقر. ثنى الركبة و هبط لِـ بوليفيا و الپيرو والأكوادور و پنما و كوستاريكا و نيكاراغوا و هندوراس و السلفادور و غواتيمالا. الأرجنتين دارها زنڤه زنڤه. طوالت ساقيه و وصل حتاكشي لِـ إفريقيا و آسيا. مزيان التاتّو اللّي في كتفك، نجمه حمره و كلام بِـ السبنيور، يا زبّور، تعرف ويني زمّور؟

"سلميّة، سلميّة". السلميّة أمّ أمّك سي المخصي. "سلميّة" و هاز تصويرة الـ تشي؟ تحكي بجدياتك؟ ما فيبالكش اللّي الراجل هزّ السلاح؟ راهو حارب في بلاد غير بلادو، ما أمّنش بِـ الحدود. فين الفقر و الظلم فين هو. الطبيب، المثقف، الكاتب، المفكر، الإنسان، المناضل، الأممي، كلّها كلمات تتعجن و تتحط في كلمه وحده، مقاوم. المقاومة المسلحة، الكفاح المسلح، الثورة. تي كِـ جاو يقتلوا فيه، إتفجعوا، الوجه وجه عبد و البدن بدن نمر، ضربوه في ظهرو. "ڤيفارا مات". اسم اللّـه، عليك طاحلك السكّر؟ ما تخافش، غير حضّر روحك بركه، كيما قال "لوخر"، جاينها جاينها.

 نوّارة شمس

نشر بجريدة ضد السلطة