لافــــايــات

لافايات ، نصف النهار و نصف ، خارج من قهوة ليكس متكيّف باكو دخّان و شارب ثلاثة اكسبراس ، عامل نمّوسة مـ الحيط ، راسك ثقيل لكن تحس في روحك لاباس. في فورمة كان مش الشمس ملهبة الدنيا ، تسطع في راسك تجوجمك ، تهبلك ، تهرب منها اتبعك ، تنقّز لتروتوار تتخبى تحت التيندات ، تدور الدّورة تجري ، مهمش تلوّج على ركشة ضل تشرب فاها عرقك. انت هكّاكة تتدعثر في طفلة صغيرة ، صغيرة ياسر ، شادّة أختها أصغر منها ، هازة في يداها لخرة أوراق ، تحطهملك في خشمك : " عمّي خوذ من عندي وحدو ، باش نشري دبش المكتب " ، تتذكر "بائعة الكبريت" أكثر صور متحركة بكّاتك و انتي صغير. تهز الورقة في يدّك ، يوميّة من شيرة و من شيرة أخرى سورة ياسين و المعوذتين ، يحميو مـ العين أما ما يحميوش مـ الفقر. تغزر للطفلة ، تثبت فاها ، ضريفة كـ العروسة البلاستيك ، كان مش الوسخ و سموريّة الشمس راهي بلندة ، العينين شهل واسعين ، خشمها مخنن و شعرها اشقر ملبّد. ما تلقى ما تقول : " بقدّاش هذي؟ " ، ترجع عليك ، صوتها دوباش يتسمع :" كيف تحب ، اي حاجة ، عاوني خنشري دبش المكتب ". تمدّلها إلّي كتب من ربّي ، تخليلها الورقة في ايداها و تمشي. ماكش عارف إلّي عملتو صحيح ولّا غالط ، تعرف مليح إلّي الفلوس ماهيش باش تمشي في دبش القراية ، الله أعلم في جيب شكون باش تبات و الصغيرات في دار شكون باش يباتو ، الشيء هذا تعرفو مليح أما ما نجمتش ترجّعهم ، تمنّيت جات عندك دار راك خطفتهم ، تنظّفهم ، توكّلهم ، تشربهم ، تقرّيهم و آخر الجمعة تخرج تفرهدهم و تلعب معاهم.

 احلم بابا إحلم ، حتى تززي روحك ، ما تغرّكش الهالة الكذابة إلّي تعور باها في النّاس : باكو ميريت و السّواقر في وسطو ليجوند ، آي.فون شنوه راس مالو ثمانين ألف و ماخذو أوكازيون ، تي عندك جمعتين ما صبّيتش فيه دينار. مرسكي في دار خوك يخدم صباح و ليل. خديم في سونتر دابيل ، ياكل و يوكلك ، سكر فمّك و روّح ، شد الثنيّة و ما تتلفتش وراك ، زايد تغزرلها ، حالك ما يبعدش علاها برشة ، آش يهمّك فاها ، روّح مرمت عجّة كذّابة و أعمل طلّة على الفايسبوك، قطّع و ريّش و نبّر و بزنس و برتاجي تصاور الضغار إلّي كيفها و لمّد الجامات.

 ياقوتة غالية

7 سبتمبر 2013

ضد السلطة العدد 80