نصر الدّين الفلّاق و الوزير بو عظمة

داخل للقاعة يفيّش كالسّردوك ، الحرس دايرين بيه ، الصّحافة تصوّر فيه و الطّحانة يبشبشوا بيه تقول عروس ليلة الحنّة. هو يخطب و الناس تصرفق ، هو يتكلّم و الجموع تهز في ريوسها كالدّواب ، واحد بركة كان راكش على جنب ، مقعمز في كوان يتشوحر و يتبسّم في تبسيمة مش هيّا. عمّك نصر الدّين الفلّاق ، فنان مقطّع الرباط ، قام من بلاصتو ، يقدّم وحدة وحدة ، يمشي و مشكّل يديه وراه ، عينيه منفوخين و محوقين ، الشرار طاير منهم و ناوي على عملة. جاه الدّور باش يسلّم ، منغير ما تكلّم ، قدّم و وخّر و ما تسمع كان الشبلق. حوّس تفهم تجي تفهم تضيع ، الوزير مبهّم مغطّي وجو بيديه ، القاردكورات دايرين بيه و الطّحانة يدزو في نصر الدين يخرجو فيه و يسبّو و هو شايخ بالضّحك . الدنيا خايضة ، مراد محرزي مصوّر أسطرلاب هبط علاهم كي العقاب ، راكش في تركينة حازق ضحكتو بالسّيف و يصوّر ، فيديو اكسلوزيف ، وقيلة فمّا بريم .

المهم كثر الكلام ، واحد يقلّك نصر الدين ضرب الوزير بكف ، واحد يقلّك براس و واحد يقلّك خنقو و عطاه مقص . دقايق و جا الخبر الصّحيح ، كورتاج الوزير خارج يزمّر ، ديريكسيون شارل نيكول ، شقالك و شقال عليك ، الوزير كلى عظمة على راسو. تذكرت أيّامات اللّيسي ، آخر العام ، نطّرفو بالتلامذة البهاليل ، نفكّولهم كرارسهم و نظربوهم بالعظم و الفارينة.

الكورتاج يزف زفّان ، الحالة عاجلة و خطيرة ، التهاون ممكن يتسبب في كارثة ، العظمة بدات ريحتها تفوح و تنتان و السيّد الوزير طاحلو السكر و الحديد و الجبن و النيكوتين. في الإستعجالي استقبلوه بالهلالو ، مجموعة من نخبة الأطباء التوانسة ،  عدّوه طول للسكانير ، لازمنا نقيمو الضرر ، و ربّي يستر.

الماكينة على الرّاس ، الطبيب واقف يثبت في التصاور : " سيدي الوزير متخافش ، لاباس ، تجاوزنا مرحلة لخطر ، من ألطاف الله العظمة ما كانتش حارمة و الأضرار طفيفة ، أما تعرف سيدي سترك ربّي كان زادك كعبة أخرى يعملّك عجّة في المخ و الحالة تولّي ميؤوس منها وقتها."

روّح الوزير ، و من غدوة الصباح بدى التمخوير ، عاري و لابس ، الناس الكل تبحث. نصر الدين في الرّوشارش ، هارب و غدوة يشدّوه ، مراد محرزي المصوّر موقف ، بو نصر الدين هزّوه يبحث في القرجاني ، الدار مراقبة و العيلة لكل هجت مـ الحومة. نهارين و التاليفونات تخبط و البحث جاري . فرقة القرجاني سيبت الخدم الكل ، في يدها دوسي واحد ، نصر الدين السهيلي و العظمة العجيبة . جماعة الشعانبي يرتعو ، القنابل في الجديدة ضاعت ، قاتل شكري  بالعيد و البراهيمي يصيّف في الهولو لولو ،  هذوكم يضربو بالكرتوش و التحليل الباليستي يتعمل في هولاندا و سومو غالي ، القضقاضي في شهر العسل ، أبو عياض تفرّج في التلفزة و يضحك على آخر نكته ، فرقة بحث كاملة ، برجالها و فازاتها  متجندة ليل و نهار نخدم ، تلوج على الدجاجة إلّي باضت عظمة نصر الدين العجيبة ، العظمة الثوريّة الخطيرة.

صفوان الطرابلسي

نشر بجريدة ضد السلطة 

29/08/2013