بيّــــاع الدبابز الصغير

الستّة و نص متع الصّباح و الحال رمضان ، في تونس الشهيلي يبدى من الفجر ، الناقوز يضرب ، تخرج مدهشر بالنّوم ، مفجوع ماك فاهم شيء ، تعيّط شكون ما يجاوبك حد. تحل الباب ما تلقى حد ، يطلعلك صوت من تحت الأرض ، مخشخش "معلّم فمّا دبابز ؟ ". تغزر اللّوطه ، طفل صغير ، أصغر من اللّازم ، أسمر ، مدرغم ، وجهو مفسّخ بالشونبينبون ، حوايجو مبقّعة بالزيت و الشحم و الهم. 

-" معلّم فمّا دبابز ؟ " 

- "دبابز شنيّة ؟ " تجاوبو مهمش .

- " عم الرّاجل اللّي يسكن لهنا مستانس يعطينا الدبابز البلاستيك ."

تفهم الموضوع و ما تفهمش الوضع ، تتذكر كلمات الماغوط " وحدهم الفقراء يستيقظون مبكرين قبل الجميع حتى لا يسبقهم الى العذاب أحد." تجيب شكارة الدبابز ، ناس تشرب الماء الصّافية و ناس تلم الفضلة و الشقوفات الفاضية. 

- " هاو لقيتلك ، فرّغهم و خليلي الشكارة نلملك فاها للمرّة الجاية." 

- " عيشك عمّي."

فرّغ الشكارة في برويطة مصدّية ، شادّة بالتّل ، متنجّمش تشد روحك و تسئلو السؤال : " كعبورة ، تقرى ؟ " 

- " كنت نقرى ، عمناول بطّلت." 

- " علاش بطّلت ؟ " 

- " نكرها المدرسة... " 

- " فمّا واحد يكره المدرسة !؟"

- " أي أنا..." 

تتبسّم تبسيمة صغيرة ، تسكّر الباب و تخليه يمشي في ثنيتو ، تطلع للسطح و تحب اتبعو ، مشى للزبلة ، بربش فاها ، جبد منها دبابز ماء و بيرة و خرم بلاستيك ، حطهم في البرويطة و شد الثنيّة...  

ياقوتة غالية

نشر بجريدة ضد السلطة

22/08/2013