إنسان SOS

نهار الأحد نهار الكبّي والنوم.. نصبح راڨدة بعد جمعة قراية وتعب.. الأحد اللّي فات رصّاتي غاطسة في مستنقع النقد والتحليل.. استنتاجات.. مقارنات.. واسقاطات! تي ماهو أنا راقدة ونسمع في أمّي تبكي.. يا سلّاك يا سلّاك.. قمت نجري بتباطئ نلقاها تمسح في خناينها :
لاباس آش فمّا زادة ؟
! لايكا الكلبة ماتت
! أما كلبة ؟! أكا الكلبة العربي السّايبة في الحومة
طلّيت نلقى للّا لايكا غاطسة في دموماتها.. هبطت مسّيتها نلقاها مازالت تتنفّس: هذه مضروبة بالرشّ.. الشرطة البلديّة عاملة حملة.. مازالت تتنفّس، نادي الواحد من أولاد الحومة يهزّها وراء البلاص تكمّل اطّلع الرّوح..
! مازالت حيّة؟! يا ناري علاش يضربو فيها بالرشّ
ماجاوبتهاش ودخلت نكمّل في نومتي.. ضربو الرجّالة بالرشّ خلّي لايكا الكلبة..
جاني خليل ولد الجارة يبكي تحت راسي: أمان مش إنت طبيبة ـ يراني لابسة المنديلة البيضة ساعات، أما مانيش ـ أمان داويها!
سخّفني، خرجت معاه.. مش كان أمّي تبكي! الحومة فزعت.. صغار تتباكى.. نساء و رجال.. يا بوڨلب! شدتني هستيريا ضحك، لين أمّي نعتتني بالشرّيرة قدّام النّاس الكل.. ما فهمتنيش لواش نضحك (انتم فهمتو) ! أيّا ما نكثرّش عليكم دبّرتلهم نومرو SOS animaux :
نحنا مقّرنا في نابل، أعملو نداء في صفحة الفايسبوك متاعنا.. لازم تلقاو شكون يجيبها غزرولي الكل فرد مرّة.. دخلت كي الخرّاية (باسم مستعار) و كتبت "نداء استغاثة" عطيت فيه معطيات أمي.. مش أكثر من عشر دقائق و نسمع فيها تتكلّم في التليفون وتوصف في ادريسة دارنا..
السيّد اللّي جاء مهندس إعلاميّة ما يتجاوزش عمرو 30 سنة، سيّارة فخمة.. تحمّل عناء الثنيّة من مڨرين لحيّ التحرير على خاطر للّا لايكا.. و زيد بش يهزّها للمداواة في نابل! أنا باقي نضحك وأمّي تتشوحرلي.. مافهمتنيش (انتم فهمتوني) !
صغار الحومة بصوت واحد: بعد ماتبرى ترجّعوها؟؟
جاوبهم عمّك الرّاجل بكل حزم: لازم توفّرولها مكان لائق تسكن فيه وتتعهّدو برعايتها وماكلتها ومداواتها.. ونحن نعملولكم زيارات فجئية كان نلقاوها ناقصة حاجة نفكّوها و نشوفو شكون يستبناها .

هنا أنا ماعاش نجّم و تثنيت بالضّحك.. لين أمّي نبزتني وقتلي أدخل برد عليك! أمي باقي مافهمتنيش (انتم فهمتو) !
عشيّة كاملة و أمّي في اتصال مع منقذ لايكا وبابنا ما ركحش كلّ مرّة يطبطب واحد يسأل عليها: الدكتورة روضة لاهية بيها، عملتلها السّيروم و نحتّلها الرشّ، كان تعدّي اللّيلة تمنع ..
نهار الاثنين أنا مروّحة من الفاك و يعرضني جارنا كي كنت صغيرة يخوّفني: يرحم بوك علّي عملتو مع الكلبة! ريناها في الفايسبوك بدات تتحسّن وكلات شويّة أما مسكينة عينها تعورت ..
رجعتلي هيستيريا الضحك.. صحّة ليها لايكا لقات شكون يتلها بها! دخلت شفتها نلقاها بالسيروم راقدة في فرش ومتغطية.. تاكل في اللّحم المفروم.. مع التصويرة نلقى التعليق الآتي :

" Écrivez à vos maires, notre argent des impôts ne doit pas servir à ça"

نضحك.. نضحك وأمّي مافهمتنيش (انتم فهمتو) !! فهمتو أنّه الثورة القادمة لن تكون من أجل الكرامة والقضاء على الفساد!! ستكون ثورة من أجل رشفة ماء نظيفة وعلبة دواء لم تنتهي مدّة صلوحيتها ومسؤول واحد غير كاذب و آس.او. آس إنسان.. فهمتو لماذا هذا الاستنتاج؟

رحمة البلدي